Бу дөньяның Синең ихтыярда
Икәнлеген бик соң аңладык.
Шайтан безне ялгыш юлга кертте
Без алдандык бүген, алдандык.

Аллаһ вәгъдә иткән ахирәтне
Дөнья байлыгына алмашып,
И Раббыбыз, без гаепле булдык
Һәм гөнаһлы булдык, ялгышып.

Биргәнеңә шөкер итәлмадык
Нигмәтләндерсәң дә исәпсез.
Тәүлекләр буена күңел ачтык,
Исраф иттек җирдә хисапсыз.

Керткән өлешебез булмаса да
Уңышларга дәррау шатландык.
Синең барлыгыңны инкяр итеп
Без булдырдык! - диеп мактандык.

Көч җитмәгән эшне йөкләмәдең,
Берни сорамадың Син бездән,
Уңыш килсә - бу тик Синнән булды,
Бәхетсезлекләр - үзебездән!

Бу дөньяда ризык булдыручы
Синнән башка беркем булалмый.
Яндырсаң да, суга батырсаң да,
Беркем Сиңа шелтә биралмый.

Бик күп еллар буе юмарт булдың,
Дәгъвабыз юк Сиңа, и Аллам.
Шуңа күрә бу корылык елда,
Мин яңгыр сорарга оялам!

Гази. . август- 2010